這天晚上同Mr.K去完電腦中心買野，打算行去銅鑼灣開飯，行過電車路竟然見到金記冰室的新店！裝修仲幾得意，我係食裝修大的死港女，一於就決定今晚食港式茶餐做晚餐！

餐廳一角掛滿左西瓜波，仲有膠鴨仔，
不過最吸引我係嗰隻雞，我以前都有一隻，因為我太頻繁地玩，一個星期內俾我玩死左，
都算童年回憶啦......雪櫃仲用傳統舊式雪糕放樽裝汽水，好懷舊！

咁我地都叫左個懷舊飲品，
我叫左外表清純的白雪公主，即係七喜加雲呢拿雪糕上面再加忌廉，
呢個公主一啲都唔純潔，邪惡到爆炸！

唔凍的冬天已經到達！金記都有冬天的餐牌隆重推出，我地叫左火辣辣鴛鴦雞煲！

鴛鴦雞係切雞同田雞，用窩仔熱住咁上枱，熱辣辣又香噴噴，聞到都好想食呀！

滑雞田雞固然滑溜，又入味，好快我就食左半煲了，
當中仲有幾片豬潤夾雜在入面，竟然地，豬潤好好食，無渣又唔臭！
第一次食豬潤係咁enjoy ! 

（平時叫阿媽買粥，艇仔永遠買左及第，我都會掉晒啲豬潤！）

另外仲叫左兩個飯，先嚟係黑松露臘味炒飯，用得黑松露，當然香味唔會輸蝕，
金黄色的蛋炒飯，配上點點的松露，賣相好吸引。

輕嚐一啖不得了，臘腸的肥油漏晒出嚟，每口都是臘味的香，
中間再夾雜左菜粒，芋頭粒，再加上黑松露獨有的香味，成碟飯又upgrade 左一個層次，
不油不膩，口感一啲都唔行！

見到啲臘味咁靚，我地再叫多個油香臘味飯！

係成條臘腸再加臘肉，見到個賣相就估到味道唔會差！

臘腸係半肥瘦，見到有油漏出來，油脂加左熱飯度，
完全係港式由細食到大嗰種Comfort Food，唔需要花巧，
但係一聞到就立即覺得好温暖的感覺！

食到一半，見到一對上左年紀的公公婆婆嚟食野！兩杯奶茶一件多士，就係港式招牌味道！
唔係好見佢地講野，但一坐低就知對方想食咩，好sweet 呢！

金記冰室
灣仔天樂里6-18號恆安大廈地下D及E舖


 
For Collaboration and Invitation,
Please send to : littlecatt@gmail.com
FB Page: Kawai / Small Talk Corner 
Blogspot。TheZtyle。Beautylife。FanPiece。
BECB＠Beautyexchange。Openrice。
She.com。U lifestyle。Weshare