早幾日忽然好想食聖安娜呢個紫薯蛋糕－沖繩紫薯峰$118。
根據產品介紹係用日本沖繩紫薯製作，入口香甜幼滑，配合味美紅豆忌廉及朱古力薄脆，帶來啖啖秋日滋味。

星期一打算去買，點知打電話落樓下分店無貨，咁唯有算啦，唔通打人咩。阿媽就拎起電話逐間分店問，終於在隔離村揾到，嘩！不得了！呢個蛋糕有媽媽的愛升價十倍。
雖然阿媽之後話我懶，打多個電話都唔打。

打開個盒成個都係紫色的，中間有個紫薯造的山峰。

先撕開張膠紙先切到，但當我一撕開張膠紙，旁邊的紫薯Cream痴晒係膠紙度，而且份量不是少少，多到露出中間的蛋糕餡，預算不到的狼狽情況。其實佢設計應該就咁食嘅（免切）。

兩層蛋糕中間有朱古力薄脆同埋紅豆忌廉，增加口感及層次。不是單純的紫薯蓉，忌廉及蛋糕底，不然都幾漏下。中間的小山峰因為上重下輕會倒下，完全不能影到橫切面，喜歡相機食先的，覺得有點失望，但可幸味道尚好，真的啖啖都是紫薯蓉，好滿足。留不下影像但有味道，同埋媽媽的愛心。

一向都甚少買此店的蛋糕，今次卻小發現店家沒額外供應紙碟用具，原來外盒已設計成環保蛋糕盒，只要沿著摺線就可撕開，變身成為碟及叉勺（有虛線位好易撕開的）好好的概念，平時蛋糕盒只是一個盒，蛋糕取出後已沒有用途了，現在都算是upcycling吧。
全線 聖安娜餅屋 有售