Kawai 好喜歡上環 La Postre 的 Waffle，所以生日都打算揀呢間慶祝，早前打電話去永樂街主店訂位時，店員說已經滿座，正以為失望之際，店員說離主店五分鐘步程的九如坊有另一間新店，班底一樣而且有閣樓，結果我同朋友一行三人轉戰新店。

蜂蜜檸檬單骨雞翼 $108
出街比較少食雞翼，因為要吐骨比較麻煩，這裡切開以單骨方式烹調，外層蜜糖甜味挺突出，少少檸檬香，咬開雞翼保留了鮮嫩的肉汁，簡單中見不平凡，而且酸酸甜甜都幾開胃。
牛油果刺身 $128
牛油果刺身通常都會在日本菜或素食店見到，只因牛油果的味道及質感與三文魚相似，只需點上壽司醬油，真假難分，所以有素食三文魚之稱。在這裡遇見就是有點想試吧，看看會不會是配壽司醬油。上枱才知是配上辣粉，芝士，蔬菜青檸等食材。
牛油果生熟度不錯，不會太淋身，配搭的食材亦有少驚喜，蔬菜夠新鮮，沾上辣粉更是有趣，如果濛著眼就是以為在吃三文魚吧。

西班牙豬仔骨 $288/5件
呢個我在本店都食過，豬仔骨用燒烤醬汁調味，肉質軟淋不會太韌，食落好惹味，
而且包左錫紙，可以方便用手拎著吃。不過都幾飽，差不多手板咁大，一人一件比較好。

西班牙海鮮飯 $268/2人份量
食了豬仔骨其實都有點飽，西班牙海鮮飯就到了，兩個人的份量都幾多，單看舖到密密麻麻的海鮮就知重料，細數下有青口，大蝦，貝殼及ParmaHam，海鮮全部都好鮮甜，飯底有點過油，蕃茄飯底加左少少辣，除了酸仲有微辣，令人好想追住食。

抹茶麻糬窩夫 $98Half/ $108 Full
最後都係要叫窩夫，我是為了它而來，雖然超飽都一定要點，可以點半份實在太好了，過口癮又不用剩太多，抹茶窩夫入面夾有麻糬，皮薄身脆的但食落口感煙煙韌韌有彈力，內餡充滿抹茶香回甘稍嫌不足，仲可以點旁邊的蜜糖綠茶雪糕或者紅豆蓉同吃。
整體來說，這裡暫時不是太多人，環境寧靜點又可以吹水吹耐點，只是離地鐵比較遠，但都是五分鐘步程，下次約朋友都會揀呢間，因為我的確好怕人多。

La Postre 
上環永樂街50號昌盛大廈3樓
上環九如坊12號地舖 （今次我去是這間）